Revelasion 6 KreyolAyisyen
🔊 Revelasion 6
KreyolAyisyen
0:00
0:00
- 1 Lè Ti Mouton an kase premye sele a, mwen tande youn nan kat bèt vivan yo ki t ap di ak yon vwa tankou loraj: Vini wè.
- 2 Mwen gade, epi mwen wè yon chwal blan. Moun ki te chita sou li a te gen yon banza; yo ba li yon kouwòn, epi li soti pou genyen batay la, li te genyen viktwa.
- 3 Lè li kase dezyèm sele a, mwen tande dezyèm bèt vivan an di: Vini wè.
- 4 Yon lòt chwal, yon chwal wouj, soti. Yo ba moun ki te chita sou li a pouvwa pou retire lapè sou latè, pou fè moun touye youn lòt; yo ba li yon gwo nepe tou.
- 5 Lè li kase twazyèm sele a, mwen tande twazyèm bèt vivan an di: Vini wè. Mwen gade, epi mwen wè yon chwal nwa; moun ki te chita sou li a te gen yon balans nan men li.
- 6 Mwen tande yon vwa nan mitan kat bèt vivan yo ki t ap di: Yon mezi ble pou yon goud, twa mezi lòj pou yon goud; men pa fè ni lwil la ni diven an mal.
- 7 Lè Ti Mouton an kase katriyèm sele a, mwen tande katriyèm bèt vivan an ki t ap di: Vini wè.
- 8 Mwen gade, epi mwen wè yon chwal pal. Moun ki te chita sou li a te rele Lanmò, epi Sejou Mò a t ap swiv li. Yo te resevwa pouvwa sou yon ka tè a, pou touye moun ak nepe, ak grangou, ak epidemi, ak bèt sovaj sou latè.
- 9 Lè li kase senkyèm sele a, mwen wè anba lotèl la nanm moun yo te touye poutèt pawòl Bondye a ak poutèt temwayaj yo te kenbe.
- 10 Yo t ap rele byen fò, yo t ap di: Konbyen tan ankò, O Mèt ki sen ak veridik, ou p ap jije moun ki rete sou latè yo, ou p ap vanje san nou?
- 11 Yo ba yo chak yon rad blan, epi yo di yo pou yo repoze pou yon ti tan ankò, jiskaske kantite sèvitè parèy yo ak frè yo ki gen pou mouri menm jan ak yo a fin rive.
- 12 Mwen gade lè li kase sizyèm sele a, epi te gen yon gwo tranblemanntè; solèy la vin nwa tankou twal sak ki fèt ak pwal, epi lalin nan vin wouj tankou san.
- 13 Zetwal yo tonbe soti nan syèl la sou latè, tankou fig vèt ki tonbe lè yon gwo van souke yon pye fig frans.
- 14 Syèl la disparèt tankou yon woulo liv yo woule; tout mòn ak tout zile yo deplase soti nan plas yo.
- 15 Wa latè yo, grannèg yo, moun rich yo, kòmandan yo, vanyan sòlda yo, tout esklav ak tout moun lib yo, yo tout kache nan twou ak nan wòch mòn yo.
- 16 Yo t ap di mòn yo ak wòch yo: Tonbe sou nou, kache nou devan moun ki chita sou twòn nan ak devan kòlè Ti Mouton an.
- 17 Paske gwo jou kòlè li a rive; kiyès ki ka kanpe devan li?