Som 115 KreyolAyisyen
🔊 Som 115
KreyolAyisyen
0:00
0:00
- 1 Pa pou nou, O Seyè, pa pou nou, men bay non ou glwa a, poutèt mizèrikòd ou ak verite ou.
- 2 Poukisa moun lòt nasyon yo ta di: Kote Bondye yo a?
- 3 Men Bondye nou an, li nan syèl la; li fè tou sa l' vle.
- 4 Zidòl yo se ajan ak lò, travay lèzòm fè ak men yo.
- 5 Yo gen bouch, men yo pa pale; yo gen je, men yo pa wè.
- 6 Yo gen zòrèy, men yo pa tande; yo gen nen, men yo pa pran sant.
- 7 Yo gen men, men yo pa ka manyen anyen; yo gen pye, men yo pa ka mache; yo pa ka pale nan gòj yo.
- 8 Moun ki fè yo, se tankou yo ye; tout moun ki mete konfyans yo nan yo, se menm jan ak yo.
- 9 Nou menm pèp Izrayèl la, mete konfyans nou nan Seyè a; se li menm ki tout sekou yo, se tout pwoteksyon yo.
- 10 Nou menm, fanmi Arawon an, mete konfyans nou nan Seyè a; se li menm ki tout sekou yo ak tout pwoteksyon yo.
- 11 Nou tout ki gen krentif pou Seyè a, mete konfyans nou nan li; se li menm ki tout sekou yo, se tout pwoteksyon yo.
- 12 Seyè a te sonje nou; l'ap beni nou; l'ap beni kay Izrayèl la; l'ap beni kay Arawon an.
- 13 L'ap beni tout moun ki gen krentif pou Seyè a, piti kou gran.
- 14 Seyè a va fè ou vin pi plis toujou, ou menm ak pitit ou yo.
- 15 Seyè a ki fè syèl la ak tè a ap beni nou.
- 16 Syèl la, wi syèl la se pou Seyè a; men li bay lèzòm tè a.
- 17 Se pa moun mouri ki fè lwanj Seyè a; se pa moun ki desann kote mò yo ye a ki fè lwanj li.
- 18 Men nou menm, n'ap di Bondye mèsi depi kounye a ak pou tout tan. Lwanj pou Seyè a.