Som 34 KreyolAyisyen
🔊 Som 34
KreyolAyisyen
0:00
0:00
- 1 M'ap tout tan di Bondye mèsi. M'ap toujou kenbe lwanj li nan bouch mwen.
- 2 Nanm mwen ap fè lwanj li nan Seyè a; moun ki soumèt devan Bondye yo va tande sa, epi yo va kontan.
- 3 Ann fè lwanj Seyè a avè m'; ann fè lwanj non li ansanm.
- 4 Mwen chache Seyè a, li tande m', li delivre m' anba tout sa m' pè yo.
- 5 Yo te vire gade l', epi lajwa te vin sou yo; yo pa t' wont figi yo.
- 6 Nonm pòv la te kriye, epi Seyè a te tande l'; li te delivre l' anba tout tray li yo.
- 7 Zanj Seyè a kanpe bò kote tout moun ki gen krentif pou li, pou l' delivre yo.
- 8 Goute, wè jan Seyè a bon; benediksyon pou moun ki mete konfyans yo nan li.
- 9 Nou tout pèp li yo, se pou nou gen krentif pou Seyè a, paske moun ki gen krentif pou li yo p'ap janm manke anyen.
- 10 Ti lyon yo nan bezwen, yo soufri grangou; men moun k'ap chache Seyè a p'ap manke anyen ki bon.
- 11 Vini non, timoun mwen yo, koute sa m'ap di nou; m'ap moutre nou ki jan pou nou gen krentif pou Seyè a.
- 12 Ki moun ki anvi lavi, ki renmen viv lontan, ki ka wè byen?
- 13 Kenbe lang ou pou l' pa fè sa ki mal; kenbe bouch ou pou l' pa pale manti.
- 14 Kite sa ki mal, fè byen; chèche lapè, epi pouswiv li.
- 15 Je Seyè a sou moun ki mache dwat devan Bondye yo; zòrèy li louvri pou tande rèl yo.
- 16 Figi Seyè a kont moun k'ap fè sa ki mal, pou l' efase tout chonje yo sou latè.
- 17 Moun ki mache dwat yo rele, Seyè a tande yo; li delivre yo anba tout tray yo.
- 18 Seyè a toupre moun ki gen kè yo fann; li sove moun ki gen lespri yo kraze.
- 19 Moun ki mache dwat devan Bondye gen anpil soufrans; men Seyè a ap delivre l' anba yo tout.
- 20 Li pwoteje tout zo nan kò l'; pa gen youn ki kase.
- 21 Malè ap touye mechan yo; moun ki rayi moun ki mache dwat yo ap pèdi tèt yo.
- 22 Seyè a delivre nanm sèvitè l' yo; moun ki mete konfyans yo nan li p'ap janm pèdi tèt yo.