Levitik 4 - EMET

¹ Seyè a pale ak Moyiz, li di l' konsa:

² Pale ak moun pèp Izrayèl yo, di yo pou mwen: Si yon moun peche san li pa konnen kont yonn nan kòmandman Seyè a, bagay moun pa gen dwa fè, epi li fè sa ki mal:

³ Si prèt yo chwazi a fè yon bagay ki sanble ak yon peche pèp la, l'a mennen yon jenn towo bèf san okenn enfimite bay Seyè a, kòm ofrann pou peche li te fè a.

⁴ L'a mennen towo bèf la devan pòt Tant Randevou a, devan Seyè a, l'a mete men l' sou tèt towo bèf la, epi l'a touye towo bèf la devan Seyè a.

⁵ Prèt yo chwazi a va pran san towo bèf la, l'a pote l' nan Tant Randevou a.

⁶ Prèt la va tranpe dwèt li nan san an, epi l'a voye san an sèt fwa devan Seyè a, devan rido kote ki apa pou Bondye a.

⁷ Prèt la va mete ti gout nan san an sou kòn lotèl lansan santi bon an ki devan Seyè a, ki nan Tant Randevou a. L'a vide tout san towo bèf la nan pye lotèl kote yo boule ofrann yo, ki bò pòt Tant Randevou a.

⁸ Apre sa, l'a wete tout grès towo bèf ki te sèvi pou peche a, grès ki kouvri trip yo ak tout grès ki sou trip yo.

⁹ De ren yo ak grès ki sou yo a, ansanm ak grès ki sou vant yo a, ansanm ak grès ki sou fwa a, l'a boule yo nan yon sèl moso.

¹⁰ Menm jan yo te wete l' nan vyann towo yo te ofri pou di Bondye mèsi a, prèt la va boule tout bagay sa yo sou lotèl kote yo boule ofrann yo a.

¹¹ Po towo bèf la ansanm ak tout chè li, tèt li, janm li, trip li ak poupou li,

¹² Wi, l'a pote tout towo bèf la andeyò kan an, nan yon kote ki pwòp, kote yo jete sann yo. L'a boule l' sou yon bwa. Se la menm y'a boule l' kote yo jete sann yo a.

¹³ Men, si tout pèp Izrayèl la fè yon bagay ki mal paske yo pa konnen, epi tout pèp la pa konnen sa l' te fè a, si yo fè yon bagay ki kont lòd Seyè a, ki vle di yo pa fè anyen,

¹⁴ Lè pèp la vin konnen kisa yo te fè ki mal la, y'a ofri yon jenn towo bèf pou yo touye l', y'a mennen l' devan Tant Randevou a.

¹⁵ Epi ansyen yo nan pèp la va mete men yo sou tèt towo bèf la, epi y'a touye towo bèf la devan Seyè a.

¹⁶ Prèt yo chwazi a va pote san towo bèf la nan Tant Randevou a.

¹⁷ L'a tranpe dwèt li nan san an sèt fwa devan Seyè a, devan rido a.

¹⁸ L'a mete ti gout nan san an sou kòn lotèl ki devan Seyè a, nan Tant Randevou a. L'a vide tout san an nan pye lotèl kote yo boule ofrann yo, ki toupre pòt Tant Randevou a.

¹⁹ Lè l' fin fè sa, l'a pran tout grès li a, l'a boule l' sou lotèl la.

²⁰ Menm sa li te fè ak towo li te ofri pou peche a, l'a fè l' ak towo sa a tou. Konsa, prèt la va fè ofrann bèt pou mande Bondye padon, epi Bondye va padonnen l' sa l' te fè a.

²¹ Lè l'a pran towo bèf la, l'a pote l' andeyò kan an, l'a boule l' menm jan li te boule towo bèf li te fè ak premye towo a. Se va yon ofrann pou peche tout pèp la.

²² Lè yon chèf fè yon peche, lè li fè yon bagay ki pa pou li, san li pa konnen, kont kòmandman Seyè a, Bondye li a, konsènan bagay moun pa gen dwa fè. Lè sa a, li koupab.

²³ Oubyen si li rive konnen peche li te fè a, l'a mennen yon bouk kabrit san okenn enfimite, l'a ofri l' bay Bondye.

²⁴ L'a mete men l' sou tèt kabrit la, l'a touye l' sou bò nò lotèl kote yo konn touye bèt yo ofri pou boule nèt yo. Se yon ofrann pou peche li fè.

²⁵ Prèt la va pran nan san ofrann pou peche a ak dwèt li, l'a mete l' sou kòn lotèl kote yo boule ofrann yo, l'a vide san an nan pye lotèl kote yo boule ofrann yo.

²⁶ L'a boule tout grès la sou lotèl la, menm jan yo fè l' pou grès ofrann bèt pou di Bondye mèsi a. Prèt la va fè sèvis pou mande Bondye padon pou peche moun nan, epi Bondye va padonnen l' sa l' te fè a.

²⁷ Si yon moun nan pèp la fè yon bagay ki pa kòrèk, paske li pa konnen, si li fè yon bagay ki kont kòmandman Seyè a, ki vle di li pa gen dwa fè.

²⁸ Oubyen lè li rive konnen peche li te fè a, l'a mennen yon fenmèl kabrit san okenn enfimite, l'a ofri l' bay Bondye pou peche li te fè a.

²⁹ L'a mete men l' sou tèt bèt li ofri pou peche a, l'a touye l' nan plas yo konn ofri bèt pou boule nèt yo.

³⁰ Prèt la va pran san an ak dwèt li, l'a mete l' sou kòn lotèl kote yo boule ofrann yo, epi l'a vide tout san an nan pye lotèl la.

³¹ Lè l' fin fè sa, l'a pran tout grès la, menm jan yo fè l' ak grès ofrann bèt pou di Bondye mèsi a, l'a boule l' sou lotèl la pou l' fè yon bon sant ki fè Seyè a plezi. Se konsa prèt la va fè sèvis pou mande Bondye padon pou peche moun lan te fè a, epi Bondye va padonnen l' sa l' te fè a.

³² Men, si se yon ti mouton l'ap mennen pou peche l' fè, l'a mennen yon fenmèl ki pa gen okenn enfimite.

³³ L'a mete men l' sou tèt bèt yo ofri pou peche a, l'a touye l' sou bò nò kote yo touye bèt yo ofri pou boule nèt yo.

³⁴ Prèt la va pran nan san ofrann pou peche a ak dwèt li, l'a mete l' sou kòn lotèl kote yo boule ofrann yo, epi l'a vide tout san an nan pye lotèl la.

³⁵ Lè l' fin fè sa, l'a pran tout grès bèt la, menm jan yo fè l' ak grès mouton yo ofri pou di Bondye mèsi a, l'a boule tout grès la sou lotèl la, ansanm ak lòt ofrann yo fè pou Seyè a. Se konsa prèt la va fè sèvis pou mande Bondye padon pou peche li te fè a, epi Bondye va padonnen l' sa l' te fè a.

Levitik 4 KreyolAyisyen