Jenez 26 KreyolAyisyen
🔊 Jenez 26
KreyolAyisyen
0:00
0:00
- 1 Te gen yon lòt grangou nan peyi a, pi rèd pase premye grangou ki te tonbe sou tan Abraram nan. Izarak ale bò kote Abimelèk, wa Filisti yo, nan peyi Gera.
- 2 Seyè a parèt devan l', li di l': Pa desann nan peyi Lejip. Rete nan peyi m'ap di ou la.
- 3 Rete nan peyi sa a, m'ap avè ou, m'ap beni ou, paske m'ap bay ou tout peyi sa yo ansanm ak tout pitit pitit ou yo. M'ap kenbe sèman mwen te fè bay Abraram, papa ou.
- 4 M'ap fè pitit pitit ou yo peple tankou zetwal nan syèl la. M'ap ba yo tout peyi sa yo. Gremesi pitit pitit ou yo, tout nasyon sou latè va jwenn benediksyon.
- 5 Paske Abraram te koute vwa mwen, li te respekte lòd mwen yo, kòmandman mwen yo, lwa mwen yo ak regleman mwen yo.
- 6 Izarak te rete Gera.
- 7 Lè mesye yo nan zòn nan mande l' kisa madanm li ye, li reponn yo se sè li li ye, paske li te pè di se madanm li li ye. Li t'ap di nan kè l': Mesye yo ka touye m' pou yo pran Rebeka, ki te bèl anpil.
- 8 Lè Izarak te fin rete la depi yon bon bout tan, Abimelèk, wa Filisti yo, gade nan yon fenèt, li wè Izarak t'ap jwe ak Rebeka, madanm li.
- 9 Abimelèk rele Izarak, li di l': Gade non, se madanm ou li ye. Kouman ou fè di se sè ou li ye? Izarak reponn: Mwen te di sa paske mwen te pè pou mouri poutèt madanm mwen.
- 10 Abimelèk di l': Sa ou fè nou la a? Si yonn nan mesye nou yo te kouche ak madanm ou, ou ta rann nou koupab.
- 11 Epi Abimelèk bay tout pèp la lòd sa a: Si yon moun manyen nonm sa a oswa madanm li, se pou yo touye l'.
- 12 Izarak te simen nan peyi a, epi li rekòlte nan menm lanne a san fwa plis. Seyè a te beni l'.
- 13 Nonm lan te vin pi gran, li t'ap fè pwogrè, li t'ap grandi jouktan li vin trè fò.
- 14 Li te gen anpil mouton, bèf ak anpil sèvitè. Sa te fè moun Filisti yo jalouzi pou li.
- 15 Tout pi domestik Abraram te fouye yo, moun Filisti yo te bouche yo, yo te plen yo ak tè.
- 16 Abimelèk di Izarak: Wete kò ou, paske ou vin pi pwisan pase nou.
- 17 Izarak pati, li moute tant li nan fon Gera a. Li rete la.
- 18 Li fouye pi dlo yo te fouye nan tan Abraram, papa l'. Moun Filisti yo te bouche pi sa yo apre lanmò Abraram. Izarak ba yo menm non papa l' te ba yo.
- 19 Domestik Izarak yo fouye yon twou nan fon an, yo jwenn yon pi dlo k'ap soti.
- 20 Gadò mouton Gera yo te fè kont ak gadò mouton Izarak yo. Yo t'ap di: Dlo a se pou nou! Se konsa Izarak rele pi a Esèk, paske yo te fè kont avè l'.
- 21 Yo fouye yon lòt pi, epi yo te fè kont pou sa a tou. Li rele pi a Sitna.
- 22 Apre sa, li pati, li fouye yon lòt pi. Yo pa t' fè kont pou sa a. Li rele pi a Rehobòt, li di: Kounye a Seyè a ban nou plas. Nou pral fè anpil pitit nan peyi a.
- 23 Li soti la, li monte Bècheba.
- 24 Menm jou lannwit sa a, Seyè a parèt devan li, li di: Mwen se Bondye Abraram, zansèt ou. Ou pa bezwen pè, paske mwen avèk ou. M'ap beni ou, m'ap ba ou anpil pitit pitit, poutèt Abraram, sèvitè m' lan.
- 25 Li bati yon lotèl la, li fè sèvis pou Seyè a. Li moute tant li la. Domestik Izarak yo fouye yon pi la.
- 26 Abimelèk soti Gera, li vin jwenn li. Li te gen Akouzat, yonn nan zanmi l' yo, ansanm ak Pikòl, kòmandan lame li a.
- 27 Izarak mande yo: Poukisa nou vin jwenn mwen? Nou rayi m', nou mete m' ale byen lwen nou.
- 28 Yo reponn: Nou wè Seyè a avèk ou. Se poutèt sa nou di: Ann siyen yon alyans avè ou.
- 29 Ou p'ap fè nou okenn mal, menm jan nou pa t' janm manyen ou, epi nou pa t' fè ou anyen lòt pase byen. Nou kite ou ale ak kè poze. Kounye a, ou se yon moun Seyè a beni.
- 30 Izarak fè yon fèt pou yo, yo manje epi yo bwè.
- 31 Nan granmaten, yo leve byen bonè, yo sèmante yonn bay lòt. Izarak voye yo ale, epi yo pati ak kè poze.
- 32 Menm jou sa a, domestik Izarak yo vin ba li nouvèl pi yo te fouye a. Yo di: Nou jwenn dlo.
- 33 Se poutèt sa yo rele vil la Bècheba jouk jounen jòdi a.
- 34 Ezaou te gen karantan lè li te marye ak Jidit, pitit fi Beeri, yon moun Et, ak Basmat, pitit fi Elon, yon moun Et.
- 35 Sa te fè Izarak ak Rebeka lapenn anpil.