Jan 16 KreyolAyisyen
🔊 Jan 16
KreyolAyisyen
0:00
0:00
- 1 Mwen di nou bagay sa yo pou nou pa dekouraje.
- 2 Y'a mete nou deyò nan sinagòg yo. Wi, lè a ap vini, kote nenpòt moun ki va touye nou va mete nan tèt li se yon sèvis y'ap rann Bondye.
- 3 Epi y'ap fè nou sa paske yo pa konnen ni Papa a ni mwen.
- 4 Men, mwen di nou bagay sa yo, pou lè lè a rive, nou ka chonje mwen te di nou yo. Mwen pa t di nou bagay sa yo okòmansman, paske mwen te avèk nou.
- 5 Men kounye a, m ap ale bò kote moun ki voye m nan, epi nou yonn pa mande m: Ki kote m prale?
- 6 Men, paske mwen di nou bagay sa yo, lapenn anvayi kè nou.
- 7 Men, m ap di nou laverite: Li pi bon pou nou pou m ale. Paske, si m pa ale, Moun ki gen pou konsole nou an p ap vin jwenn nou. Men, si m ale, m ap voye l ban nou.
- 8 Lè l vini, la moutre moun lemonn yo jan yo ye a sou kesyon peche, sou kesyon jistis, ak sou kesyon jijman.
- 9 Konsènan peche a, paske yo pa kwè nan mwen;
- 10 Konsènan jistis la, paske mwen prale bò kot Papa m, epi nou p ap wè m ankò;
- 11 Konsènan jijman an, paske chèf mond sa a deja jije.
- 12 Mwen gen anpil bagay ankò pou m di nou, men nou pa ka sipòte yo kounye a.
- 13 Men, lè li menm, Lespri verite a, vini, la mennen nou nan tout verite a. Paske li p ap pale pa li. Men, tou sa l tande, la di nou sa. La fè nou konnen bagay ki gen pou vini yo.
- 14 L'a fè yo wè pouvwa mwen, paske l'a pran sa ki pou mwen, l'a fè nou konnen l.
- 15 Tout sa Papa a genyen se pou mwen yo ye. Se poutèt sa mwen di l gen pou l pran sa ki pou mwen, l'ap fè nou konnen yo.
- 16 Talè konsa nou p ap wè m ankò, talè konsa n a wè m ankò, paske m ap tounen bò kote Papa a.
- 17 Lè sa a, kèk nan disip li yo t'ap di ant yo: Sa l vle di sa: Talè konsa nou p ap wè m ankò, talè konsa n a wè m ankò? Sa l di nou la a: Paske mwen pral jwenn Papa a?
- 18 Yo di konsa: Kisa l ap di: Talè konsa? Nou pa konnen sa l ap di.
- 19 Jezi te konnen yo te vle poze l kesyon, li di yo: Mwen di: Talè konsa nou p ap wè m ankò, talè konsa nou pral wè m ankò. Èske se sou do nou ap keyi yonn ap mande lòt?
- 20 An verite, an verite, m ap di nou sa: Nou pral kriye, nou pral plenyen, men lemonn pral rejwi. Nou pral gen lapenn, men lapenn nou pral tounen lajwa.
- 21 Lè yon fanm ap akouche, l ap nan lapenn, paske lè l rive. Men, kou pitit la fin akouche, li bliye tout soufrans li yo tèlman li kontan dèske yon lòt gason fèt sou latè.
- 22 Kounye a nou nan lapenn; men, m a wè nou ankò. Kè nou va kontan, epi pèsonn p ap ka wete lajwa sa a nan men nou.
- 23 Jou sa a, nou p ap poze m kesyon sou anyen. An verite, an verite, m ap di nou sa: Nenpòt sa nou mande Papa a nan non mwen, l a ban nou li.
- 24 Jouk jounen jodi a, nou pa mande anyen nan non mwen. Mande, epi n ap resevwa, pou lajwa nou ka konplè.
- 25 Mwen di nou tout bagay sa yo an parabòl. Men, lè a ap vini, mwen p ap pale an parabòl ankò avèk nou, men m ap pale nou kareman de Papa a.
- 26 Jou sa a, n a mande nan non mwen. Mwen pa di m ap lapriyè Papa a pou nou.
- 27 Paske Papa a li menm renmen nou, paske nou renmen m, epi nou kwè mwen soti bò kot Bondye.
- 28 Mwen soti bò kote Papa a, mwen vin nan lemonn lan. Kounye a, m ap kite lemonn lan, epi m pral jwenn Papa a.
- 29 Disip li yo di li: Koute, w ap pale kareman kounye a, ou pa di okenn pwovèb.
- 30 Kounye a nou sèten ou konn tout bagay, ou pa bezwen pèsonn poze ou kesyon. Se poutèt sa nou kwè ou soti nan Bondye.
- 31 Jezi reponn yo: Nou kwè kounye a?
- 32 Gade, lè a ap vini, li rive deja, kote nou pral gaye, chak moun pral kouri bò pa yo. Nou pral kite m pou kont mwen. Men, mwen pa pou kont mwen, paske Papa a avèk mwen.