ElohimEmet

Egzod 1 KreyolAyisyen

Chapit Swivan ⟩
🔊 Egzod 1 KreyolAyisyen
0:00 0:00
  1. 1 Men non pitit Izrayèl yo ki te desann nan peyi Lejip avèk Jakòb ansanm ak tout fanmi yo.
  2. 2 Woubenn, Simeyon, Levi ak Jida,
  3. 3 Isaka, Zabilon ak Benjamen,
  4. 4 Dann, Neftali, Gad ak Asè.
  5. 5 Antou te gen swasanndis nanm ki te soti nan ren Jakòb yo. Jozèf te deja nan peyi Lejip.
  6. 6 Jozèf mouri, tout frè l' yo mouri ansanm ak tout moun nan jenerasyon sa a.
  7. 7 Pitit Izrayèl yo te fè anpil pitit, yo te peple anpil. Yo te vin pi fò toujou. Tout peyi a te plen ak yo.
  8. 8 Lè sa a, te gen yon nouvo wa ki te vin nan peyi Lejip la. Wa sa a pa t' konnen Jozèf.
  9. 9 Epi li di pèp li a: Gade, pèp Izrayèl la gen plis moun pase nou epi yo gen plis pouvwa pase nou.
  10. 10 Ann pran prekosyon ak yo pou yo pa vin pi plis. Si lagè pete, yo ka mete tèt ansanm ak lènmi nou yo pou goumen ak nou, epi yo ka soti kite peyi a.
  11. 11 Se poutèt sa, yo te mete chèf travay sou yo pou fè yo travay di. Yo te bati Piton ak Ranmsès, vil kote yo te pote trezò pou Farawon an.
  12. 12 Men plis yo t'ap maltrete yo, se plis yo te vin pi plis. Moun peyi Lejip yo te nan lapenn poutèt pèp Izrayèl la.
  13. 13 Moun peyi Lejip yo te fòse pèp Izrayèl la sèvi avèk fòs.
  14. 14 Yo rann lavi yo anmè, yo fè yo travay di nan fè mòtye, nan fè brik, nan tout kalite travay nan jaden. Yo fòse yo sèvi yo ak tout fòs yo.
  15. 15 Wa peyi Lejip la te pale ak de fanmsaj ebre yo. Youn te rele Chifra, lòt la te rele Pwa.
  16. 16 Li di yo konsa: Lè n'ap akouche medam ebre yo, lè yo kouche sou chèz yo, si se yon gason, touye l'. Men si se yon fi, kite l' viv.
  17. 17 Men fanmsaj yo te gen krentif pou Bondye, yo pa t fè sa wa Lejip la te ba yo lòd fè a. Yo te kite timoun gason yo viv.
  18. 18 Wa peyi Lejip la rele fanmsaj yo, li di yo: Poukisa nou fè sa? Nou kite ti gason yo viv?
  19. 19 Fanmsaj yo di Farawon an: Medam ebre yo pa tankou medam peyi Lejip yo. Yo gen anpil kouraj. Yo akouche anvan menm nou rive bò kote yo.
  20. 20 Se konsa Bondye te byen fè fanmsaj yo. Pèp la te miltipliye, yo te vin pi fò.
  21. 21 Paske fanmsaj yo te gen krentif pou Bondye, Bondye te ba yo kay pou yo fè pitit.
  22. 22 Farawon an bay tout pèp la lòd sa a: Se pou nou jete tout gason ki fèt nan gwo larivyè a. Se pou nou kite tout fi viv.

Egzod1 Chapit Swivan ⟩