1Kwonik 22 KreyolAyisyen
🔊 1Kwonik 22
KreyolAyisyen
🔇 Audio not available
Expected:
wwwroot/BibleAudio/KreyolAyisyen/OldTestament/1Kwonik/22.mp3
- 1 Lè sa a, David di: Se la kay Seyè a, Bondye a, ye, ansanm ak lotèl pou boule ofrann bèt pou pèp Izrayèl la.
- 2 David bay lòd pou yo rasanble tout etranje ki te nan peyi Izrayèl la. Li mete mason pou taye wòch pou bati kay Bondye a.
- 3 David te pare fè an kantite pou fè klou pou batan pòt yo ak pou jwenti yo, epi kwiv an kantite ki pa t' ka peze.
- 4 Te gen anpil bwa sèd tou, paske moun Sidon yo ak moun Tir yo te pote anpil bwa sèd bay David.
- 5 David di konsa: Salomon, pitit gason m' lan, se yon timoun ki poko gen konesans. Tanp yo pral bati pou Seyè a, se pou l' yon tanp bèl anpil, pou tout moun sou latè ka pale de li. M'ap pare tout bagay pou li anvan menm li mouri. Se konsa David te fè anpil preparasyon anvan li mouri.
- 6 Lè sa a, li rele Salomon, pitit gason l' lan, li ba li lòd pou l' bati yon kay pou Seyè a, Bondye pèp Izrayèl la.
- 7 Lè sa a, David di Salomon konsa: Pitit gason m', mwen te fèk sot nan tèt mwen pou m' bati yon kay pou Seyè a, Bondye mwen an.
- 8 Men pawòl Seyè a vin jwenn mwen, li di m' konsa: Ou fè anpil san koule, ou fè anpil lagè. Se pa ou ki pral bati tanp lan pou mwen, paske ou fè twòp san koule sou latè devan je mwen.
- 9 Gade, yon pitit gason pral fèt pou ou, ki pral yon nonm ki p'ap gen pwoblèm. M'ap fè l' viv ak kè poze, anba men tout lènmi l' yo toupatou. Y'a rele l' Salomon. M'ap bay pèp Izrayèl la lapè ak trankilite pandan tout rèy li.
- 10 Se li menm ki va bati yon kay pou mwen. L'ap yon pitit gason pou mwen, mwen menm m'ap yon papa pou li. M'ap mete twòn wayòm li an sou Izrayèl pou tout tan.
- 11 Kounye a, pitit gason m, se pou Seyè a toujou la avèk ou. Pou ou ka reyisi, pou ou bati kay Seyè a, Bondye ou la, jan li te di ou la.
- 12 Se pou Seyè a ba ou sajès ak bon konprann, pou l' mete ou chèf nan peyi Izrayèl la, pou ou ka kenbe lalwa Seyè a, Bondye ou la.
- 13 Konsa, ou va reyisi si ou veye kò ou pou ou swiv lòd ak prensip Seyè a te bay Moyiz pou pèp Izrayèl la. Se pou ou vanyan, pran kouraj. Pa pè, pa dekouraje.
- 14 Kounye a, nan tout mizè mwen, mwen pare pou kay Seyè a sanmil (100,000) talan lò, yon milyon (1,000,000) talan ajan, yon kantite kwiv ak fè moun pa ka peze. Gen anpil kwiv. Mwen pare bwa ak wòch tou. Ou mèt ajoute plis toujou.
- 15 Gen anpil travayè avèk ou, moun ki ka taye wòch, moun ki ka travay bwa, ak tout kalite moun ki atizan nan tout kalite travay.
- 16 Pou lò, ajan, kwiv ak fè, ou pa gen kantite. Leve non, aji. Se pou Seyè a avè ou.
- 17 David te pase tout chèf pèp Izrayèl yo lòd pou yo ede Salomon, pitit gason l' lan. Li te di yo konsa:
- 18 Seyè a, Bondye nou an, pa la avèk nou? Li ban nou lapè sou tout bò kote nou? Li lage tout moun nan peyi a nan men mwen. Tout peyi a soumèt nèt devan Seyè a ak devan pèp li a.
- 19 Kounye a, se pou nou mete tout kè nou ak tout nanm nou pou nou chache Seyè a, Bondye nou an. Leve non, bati yon tanp pou Seyè a, Bondye a, pou nou ka pote Bwat Kontra Seyè a ak tout bagay sakre yo ladan l', nan kay yo pral bati pou non Seyè a.